ثورة من طرف ثالث

 

لاحظت في الفترة الأخيرة مشادات غير لطيفة ما بين الشعب و بعضه وخصوصا لما بتيجي سيرة المجلس العسكري .....ناس تقول المجلس كويس و ناس تقول المجلس وحش ....

وحش إيه بس يا شعب ده حتى مشيرنا راجل محترم ....ما شوفتوش شكله في البدلة السموكنج .....ضابط ضابط يعني ....هو اللي محيرني في موضوع بدلته ده حاجتين ....كاميرا التليفزيون الجاهزة بالصدفة البحتة ...... و مكان التصوير ....ليه وسط البلد ....كان المفروض بالبدلة دي يكون متصور في محمد علي مش بقولكم " ضابط"

ما علينا خلينا في موضوعنا .....أنا لما لاقيت الموضوع زاد عن حده و الناس بقت بتطالب بطلبات غريبة ....اشي  تسليم السلطة,  واشي محاكمة المشير ...وكلام من ده قلت يا واد لازم تعترف بقي أحسن الهزار قلب بجد عشان كده النهارده جايب لستة اعترافاتي بصفتي احد أفراد الطرف الثلث المسمي اللهو الخفي

و عشان تصدقوني لازم احلف ...... اقسم بالله العظيم أنا الطرف الثالث أن لا أقول الحق

- أنا اللي حميت الثورة...."حمكوا في كنكة"

- أنا اللي ضربت المتظاهرين يوم 25 فبراير و بعدين طلعت قولت معلش اصل رصيدي يسمح " وأنا اصلا سالف ال2 جنيه مش دافعهم أساسا"

- أنا اللي وزيت السلفيين يطلعوا الناس تقول نعم في الاستفتاء عشان خاطر المادة أتنين اللي مش خاضعة للتعديل اصلا ما تتلغيش و ده عشان اخد شرعية أحط بيها إعلان دستوري ييني شرعية و سلطة اكتر

- أنا اللي فضيت اعتصام 9 مارس بالقوة و ضربت و سحلت المعتصمين

- أنا اللي اخدت البنات اللي كانوا معتصمين يوم 9 مارس و عملتلهم كشوف عذرية قدام العساكر " وماله يا أخوانا ما هو لا حياء في الدين و لا حياء في العلم و لا حياء عند الشرطة العسكرية"

- أنا اللي عملت أنا أسف يا ريس عشان تاكل في دماغ الشباب علي النت و في الشارع

- أنا اللي طلعت عيل اسمه سبايدر علي أساس انه نموذج للشباب و هيصدقوه و قلت عليه ابني في عزاء أمي

- أنا اللي هاجمت اعتصام 8 ابريل و قتلت ضابط و اعتديت علي الباقيين و حولت الضباط للسجن الحربي

- أنا اللي افتعلت أحداث مسرح البالون عشان تفضل البلد هايجة و ما حدش يقول انتخابات

- أنا اللي بعت البلطجية يحاولوا يفضوا اعتصام 9 يوليو

- أنا اللي فضيت اعتصام يوليو بالقوة يوم 1 أغسطس الموافق 1 رمضان ....و دخلت عمر مكرم بالجزم

- أنا اللي فضلت محتل صينية ميدان التحرير طول رمضان

- أنا اللي ما بنفذش أي طلب ألا لما يتعملي مليونية الأول

- أنا اللي وقفت عجلة الإنتاج  بالرغم من أني بشتري عربيات BMW x3  للشرطة

- أنا اللي بقول الاحتياطي هيخلص من غير ما اعمل خطوة واحدة ترفعه

 - أنا اللي بقول السياحة مش شغالة بالرغم من أن أنا اللي بلغي مهرجان القاهرة السينمائي الدولي اللي بينشط السياحة كل سنة

- أنا اللي مش عاوز اعمل حد أقصي و حد ادني للأجور  بالرغم من أني زودت مرتبات الشرطة مرتين و أديت الجيش حوافز سنة مكافئة

- أنا اللي حاكمت النشطاء و الثوار المعروفين و الغير معروفين عسكريا

- أنا اللي خليت العيسوي يقول ما فيش قناصة

- أنا اللي خليت عصام شرف شخشيخة

- أنا اللي غليت كل الأسعار عشان الناس تكره الثورة

- أنا اللي عملت أزمة في البنزين و العيش و أنابيب البوتاجاز عشان برضه الناس تلعن أبو خاش الثورة

- أنا اللي اتهمت 6 ابريل بأنها بتاخد تمويل أجنبي و ما اعرفتش اثبت منه سنت واحد

- أنا اللي شهدت أن مبارك ما قاليش اضرب نار علي المتظاهرين في ال18 يوم ولا أسوي الميدان بالأرض رغم أن ده كان كلامي قبل كده

- أنا اللي وزعت دواير الانتخابات بطريقة تخلي شوية العيال بتوع الثورة ما يعرفوش ياخدوا كراسي

- أنا اللي دهست الأقباط في ماسبيرو بالمدرعة و قتلت 19 واحد فيهم المسيحي و المسلم عشان أحافظ علي الوحدة الوطنية

- أنا اللي سرقت المدرعة اصلا

- أنا اللي هيجت الناس بكلامي في قنوات التليفزيون و كنت حخلي المسلمين يمسكوا في الأقباط في أحداث ماسبيرو بس الشعب طلع انصح مني

- أنا اللي عملت وثيقة السلمي

- أنا اللي اعتديت علي اعتصام مصابي الثورة و ولعت في خيامهم و سحلتهم و أنا في اقصي درجات ضبط النفس

- أنا اللي قتلت يومها شباب الثورة و لمتهم و رميت جثثهم في الزبالة

- أنا اللي فضلت أسبوع اضرب في الثوار بقنابل الغاز و الخرطوش والرصاص الحي في شارع محمد محمود  

- أنا قناص العيون

- أنا اللي ولعت في المجمع العلمي

- أنا اللي سحلت البنت و عريتها

- أنا اللي لبست شيخ و قلت و هي أيه اللي وداها هناك أصلا .....و هي لابسة عباية بكباسين عاللحم ....يا واد يا مؤمن

- أنا اللي خليت الشئ عكاشة يخوض في أعراض البنات " أسماء و نواره"  و يقول علي ست البنات إنها شاربة كاسين و لابسة مايوه بكيني علي اللحم

- أنا اللي تبولت علي المتظاهرين من فوق مجلس الوزراء

- أنا اللي رفضت اطفي المجمع العلمي و هو بيتحرق

- أنا اللي جبت عيال عالتلفزيون يقولوا أنهم قابضين عشان يولعوا في البلد وأنا أصلا  قابض عليهم من قبليها بيومين

- أنا اللي طلبت خروج امن و لما الناس ما رضيتش و لاقيتهم هيقلبوا علي المتحالفين معايا اللي طلبولي حصانة غيرت الاسم لخروج مشرف " احلي من الشرف ما فيش ...يا اه يا اه "

- أنا اللي عاوز انزل احتفل بالثورة بالرغم من أن مافيش حد حقه جه ..... ولا مطالب اتنفذت .....ولا مصابين اتعالجوا ....ولا شهداء خدنالهم تارهم

- أنا اللي عملت كل ده في 11 شهر بس .....و لسه قاعد علي قلبكم 6 شهور كمان

- أنا الطرف الثالث .....و اللي عقله في راسه يعرف خلاصه........عبوكوا كلكوا

- أنا اللي مش عارف انهي المقال ده الا بجملة واحدة بس ........ يسقط يسقط حكم العسكر 

                                                                 

                                        بقلم:  د.محمود الملواني

                                                         

                                      تحريرا في 20/1/2012